കലകൾക്കായി സമർപ്പിച്ച ജീവിതമായിരുന്നു ചൊവ്വല്ലൂർ കൃഷ്ണൻ കുട്ടിയുടേത്. കലാപരമായ കഴിവുകൾ പ്രോത്സാഹിപ്പിക്കാനും കലാകാരന്മാരെ പിന്തുണയ്ക്കാനും അദ്ദേഹം എന്നും ശ്രമിച്ചിരുന്നു.

കലാസ്വാദനത്തിനപ്പുറത്തേയ്ക്ക് ചെന്നെത്തിയ പ്രവർത്തനങ്ങളിലൂടെ ചൊവ്വല്ലൂർ ഈ രംഗത്ത് മറ്റുള്ളവരിൽ നിന്നും വേറിട്ടുനിന്നു. കലാപരിപാടികൾ അവതരിപ്പിക്കാനുള്ള അവസരങ്ങളൊരുക്കാനും ആസ്വാദകരിലേയ്ക്ക് അവ എത്തിക്കാനുമുള്ള ശ്രമങ്ങൾക്ക് അദ്ദേഹം ഒരിക്കലും മുടക്കം വരുത്തിയില്ല. നാടകം മുതൽ വാദ്യമേളങ്ങൾ വരെ വിവിധമായ കലാസൃഷ്ടികൾ പ്രോത്സാഹിപ്പിക്കാൻ എന്നും മുന്നിലുണ്ടായിരുന്നു ചൊവ്വല്ലൂർ.

പത്രപ്രവർത്തനകാലത്ത് ജനശ്രദ്ധയിൽ നിന്ന് മാഞ്ഞുപോകുന്ന നാടൻ കലകളെയും കഷ്ടപ്പാടുകളുടെ ജീവിതം നയിക്കേണ്ടിവരുന്ന കലാകാരന്മാരെയും കുറിച്ച് സ്ഥിരമായി എഴുതുമായിരുന്നു ചൊവ്വല്ലൂർ. അവർക്ക് അർഹതപ്പെട്ട സഹായങ്ങളും പ്രോത്സാഹനങ്ങളും നേടിക്കൊടുക്കാൻ അദ്ദേഹത്തിൻ്റെ റിപ്പോർട്ടുകളും ലേഖനങ്ങളും ഏറെ സഹായിച്ചിട്ടുണ്ട്. മലയാള മനോരമയിലെ ലീഡർ പേജും മറ്റ് റിപ്പോർട്ടുകളും കഥകളി, ഓട്ടംതുള്ളൽ, കൂത്ത്, ചെണ്ടയുൾപ്പെടെയുള്ള വാദ്യമേളങ്ങൾ എന്നീ കലാരൂപങ്ങളുടെ ജനപ്രിയത വർദ്ധിപ്പിക്കുന്നതിലും ഇവ അരങ്ങിലെത്തിക്കുന്ന കലാകാരന്മാർക്ക് പിന്തുണ ഉറപ്പുവരുത്തുന്നതിലും വലിയ പങ്കുവഹിച്ചിട്ടുണ്ട്. പ്രമുഖ വ്യക്തിത്വങ്ങളെ അംഗീകരിക്കുന്നതിനോടൊപ്പം വളർന്നുവരുന്ന കലാകാരന്മാർക്ക് ആവശ്യമായ പരിഗണന നൽകാനും അദ്ദേഹം എന്നും പ്രത്യേകം ശ്രദ്ധിച്ചു.