പ്രമുഖ സാഹിത്യകാരനും പത്രപ്രവർത്തകനുമായ ചൊവ്വല്ലൂർ കൃഷ്ണൻകുട്ടി ആറ് ദശാബ്ദത്തോളം മലയാളത്തിൻ്റെ കലാരംഗത്ത് നിറഞ്ഞുനിന്ന ബഹുമുഖ പ്രതിഭയാണ്.
1936-ൽ കൊടുങ്ങല്ലൂർ കാവിൽ വാര്യത്ത് ശങ്കുണ്ണി വാര്യരുടെയും ചൊവ്വല്ലൂർ പാറുക്കുട്ടി വാരസ്യാരുടെയും മകനായി ജനിച്ച അദ്ദേഹം കഥ, കവിത, ഭക്തിഗാനം, നാടകം, തിരക്കഥ, അഭിനയം എന്നിങ്ങനെ വിവിധ മേഖലകളിൽ പ്രാഗത്ഭ്യം തെളിയിച്ചു.
മലയാള മനോരമ ദിനപ്പത്രത്തിൽ 38 വർഷം ജോലി ചെയ്ത ചൊവ്വല്ലൂർ പത്രപ്രവർത്തനമേഖലയ്ക്ക് നൽകിയ സംഭാവനകൾ അനവധിയാണ്. കേരള കലാമണ്ഡലം, കേരള സംഗീത നാടക അക്കാദമി, കേരള സാഹിത്യ അക്കാദമി എന്നീ സ്ഥാപനങ്ങളിൽ പ്രമുഖ പദവികളും അദ്ദേഹം വഹിച്ചിട്ടുണ്ട്.
മലയാളത്തിൽ ലളിത സംഗീതത്തിനും ഭക്തിഗാനങ്ങൾക്കും ജനപ്രീതി നേടിക്കൊടുത്തവരിൽ പ്രമുഖനാണ് ചൊവ്വല്ലൂർ. ഏറെ ശ്രദ്ധേയമായ സർഗ്ഗം ഉൾപ്പെടെ നിരവധി ചലച്ചിത്രങ്ങളുടെ സംഭാഷണവും തിരക്കഥയും രചിച്ചിട്ടുണ്ട്. ഗുരുവായൂർ ദേവസ്വത്തിൻ്റെ ജ്ഞാനപ്പാന പുരസ്കാരം, കേരള സാഹിത്യ അക്കാദമി അവാർഡ്, നാടകത്തിലെ മികച്ച ഗാനരചനയ്ക്കുള്ള സംസ്ഥാന അവാർഡ്, തളി രേവതി പട്ടത്താനം പുരസ്കാരം, കേരള കലാമണ്ഡലം മുകുന്ദരാജ പുരസ്കാരം, ടോംയാസ് അവാർഡ്, ശ്രീ കേരള വർമ്മ കോളേജ് അവാർഡ് എന്നിങ്ങനെ നിരവധി പുരസ്കാരങ്ങൾ ലഭിച്ചിട്ടുണ്ട്.
