ഇംഗ്ലണ്ടിലെ കേരള ആർട്ട്സ് & ലിറ്റററി അസോസിയേഷൻ്റെ (കല) പ്രവർത്തനവിജയത്തിൽ അദ്ദേഹം വഹിച്ച പങ്ക് വലുതാണ്. ഒരു വിദേശരാജ്യത്ത് കേരളത്തിൻ്റെ തനത് സംസ്കാരം വളർത്താനും കാത്തുസൂക്ഷിക്കാനും അസോസിയേഷൻ നടത്തിയ ശ്രമങ്ങൾക്ക് വേണ്ട എല്ലാ പ്രോത്സാഹനവും പിന്തുണയുമായി എന്നും ചൊവ്വല്ലൂർ കൂടെയുണ്ടായിരുന്നു. കലയുടെ ആമുഖ ഗാനം എഴുതിയതും അദ്ദേഹം തന്നെ. അസോസിയേഷൻ്റെ വാർഷികാഘോഷത്തിന് തുടക്കം കുറിച്ച് വിളക്ക് കൊളുത്തുമ്പോൾ ആലപിക്കുന്നത് ഈ ഗാനമാണ്.

കലയുടെ സാഹിത്യ-സിനിമാ ആസ്വാദന ക്ലബിന് നടുമുറ്റം എന്ന പേരു നൽകിയതും ചൊവ്വല്ലൂരാണ്. മുതിർന്നവരോടും കുട്ടികളോടും ഇടപഴകാനും സ്വന്തം വേരുകളുമായുള്ള ബന്ധം കാത്തുസൂക്ഷിക്കാൻ അവരെ സഹായിക്കാനും അദ്ദേഹം മുൻ കൈയെടുത്തിരുന്നു.

മലയാള മനൊരമയിലെ ജോലിയിൽ നിന്ന് വിരമിച്ചശേഷം പല പ്രസിദ്ധീകരണങ്ങൾക്കും മാർഗനിർദ്ദേശങ്ങൾ നൽകി കൂടെ നിന്നിട്ടുണ്ട് ചൊവ്വല്ലൂർ. വിവിധങ്ങളായ പ്രവർത്തങ്ങളിലൂടെ കേരളത്തിൻ്റെ കലാ-സാംസ്കാരിക രംഗത്തിന് വിലമതിക്കാനാവാത്ത സംഭാവനകളാണ് അദ്ദേഹം നൽകിയത്.